Чувар на куќа

Posted by kaktusarnica 14/02/2015 0 Коментар(и) Кактипедија,Отпорни на ниски температури,

Sempervivum tectorum (Семпервивум текторум) е сукулент од родот Semprevivum во кој има повеќе од 40 (некаде може да се сретне информација дека ги има и повеќе од 50) различни видови и дури над 3000 хибриди во различни форми, бои и големини. Членовите на овој род на сукуленти се многу попознати по нивното народно име, односно како Чувар на куќа. За овие сукуленти може да се каже дека најдобро го поднесуваат студот од сите други. Името Semprevivum доаѓа од латинскиот збор што значи - засекогаш жив. Овој Чувар на куќа е еден од најраспространетите кај нас.

Постои верување дека Чуварот на куќа штити од громови, болести и вештерки. Во една народна поговорка се вели “Подобро Чувар на куќа на куќата, одколку две кучиња пред неа“.

Во народната медицина сокот од овој сукулент се употребува против изгореници, херпес, хемороиди и чиреви. Тинктура од него се употребува како препарат против воспаление на грлото. Кај народот е познат и како лек за болка во ушите. Се прекршува едно ливче и се капнува една до две капки во болното уво.

Фамилија: Crassulaceae
Род: Sempervivum
Вид: Sempervivum tectorum
Народнo имe: Чувар на куќа, Вечно жив, Кокошка и пилиња
Потекло: Алпите
Боја на цветот: Розева, бела, жолта
Сезона на цветање: Пролет-лето (секоја розета е monocarpic - еднаш цвета и потоа умира)
Висина: до 15 cm
Дијаметар: до 30 cm

Одгледување
Освен во саксија, овој сукулент може да расте на камења, ѕидови, покриви и слично, и многу лесно се одржува. Се одгледува во супстрат со добра дренажа, на места изложени на директно сонце (но само до 38 °C, при повисоки темератури може да дојде до негово оштетување) или во блага сенка. Толерира суша и бара умерено полевање. Во зима не преферира влажен супстрат, се полева само колку да не се исуши. Толерира ниски температури најмалку до -12 °C. Во пократки временски интервали може да издржи и многу пониски температури.

Извор: World of Succulents